Ekologistak Martxanetik ekologismo soziala jorratzen dugu. Ingurumenaren arazoak, ekoizpen eta kontsumo ereduekin loturik daudela uste dugu, geroz eta globalizatuagorik dagoen mundu honetan; eta guzti honek, bestelako gatazkak sozialak eragiten ditu gure ikuspegitik: Iparralde eta Hegoaldearen arteko harremanak, desberdintasun sozialak...
AHTren Aurkako bizimartxaren lehenengo etapa
2021-07-29 09:46
Atzo abiatu zen Iruñetik Atxondoko AHTaren aurkako akanpadara bizikletaz joateko martxa. Nafarroako Diputaziotik ateratzearen arrazoia argia da: Maria Chiviteren gobernuak Covid ondorengo Europako diru funtsak AHTa eraikitzeko baliatu nahi dituelako; hori dela eta euren errefusapen borobilena plazaratu nahi izan dute. Suziria piztu ondoren tropela Iruñeko karriketan barna ibili da. Tren geltokiaren ondoan Sanduzelaiko sare sozialeko bi kidek gaur egungo tren geltokia bere auzoan mantentzeko aldarria plazaratu dute. Dakizuenez, AHTaren proiektuaren arabera, AHTaren tren geltokia Etxabañoitzera eraman nahi dute pelotazo espekulatibo baten bidez. Baina gaur egun bere asmoarekin segitu nahi duten arren, eraikuntzaren egoerak ez du laguntzen. Bukatzeko, Sanduzelaiko kideek tren publiko eta soziala defendatu dute AHT arbuiatuz.
Hamaiketakoa Ororbian dagoen Gladys Enea parkean egin zuten. Itza-Oltzako plataformako kide batek ibarrean AHTak eragingo lituzkeen kalteen berri eman zuen. Izan ere Berokizelaiko lur eremua suntsituko luke estatu espainarreko lur emankorrenetakoak izan arren.
Irurtzunen harrera beroa eskaini zitzaion AHTren aurkako tropelari. Pikuxar elkarteko egoitza berriak eskainitako bazkari goxoaz berpizturik txirrindulariak Uharte Arakilera heldu ziren eta AHTren aurkako horma irudiaren ondoan argazki bat atera zuten.
Eguna bukatzeko Etxarri Aranazko atzoko helmugara iritsi ziren. Karrikestu elkartean ezinhobe afaldu ondoren Leizeak musika taldeak eskakinitako kontzertua dastatzeko parada izan zuten lotara joan aurretik.
Ekonomia sozial eraldatzailearen sareko kide da ARGIA (Bizi Baratzea). Informazio burujabetza helburu, egunerokoan gauzak egiteko beste modu batean sinesten dugu.
BIZI BARATZEAko edukiak kopiatu, moldatu, zabaldu eta argitaratzeko libre zara, beti ere, gure egiletza direla aitortzen baduzu eta baldintza beretan egiten baduzu.