Asteroko buletina
Martxoaren hasiera, zaharraren piztuera.

Bizi baratzearen plaza

Eguzki
Eguzki euskal erakunde edo elkarte ekologista bat da, boluntarioek osatua. Boluntariook herriz herriko taldeetan aritzen dira. Halaber, talde hauek laguntzaile sare baten korapiloak dira. Eguzkik herri-erakunde izaera du. Hau da, ez dute ingurugiro alorreko profesionalek osatzen, herritar “arruntek” baizik. Bakoitzak bere ezagutza eta gaitasuna taldearen zerbitzura jartzen ditu, nahi edota ahal duen neurrian. Gehiago jakiteko. http://eguzki.org/quienes-somos/

Manuri

2022-11-26 21:23

Kuadrilla polita bildu gara gaur eguerdian Usurbilgo hilerrian Manu Aranbururi azken agurra emateko. Ekitaldi hunkigarria izan da, jakina, ederra eta… alaia izan dela esatera ere ausartuko gara, paradoxa dirudien arren.

Argazkian ikusten duzue hilkutxa, Errepublikaren banderarekin, ikurrinarekin, eguzki antinuklearrarekin eta, noski, txapelarekin. Ondoan, bere moto “mitikoa” egon da, ekitaldian ere rol bat jokatu duena, baina hori ez da argazkian kabitu, ez honetan, behintzat.

Musika asko eta, gainera, ondo baino hobeto interpretatuarekin batera, senideek ez ezik hainbat alorretan lanean ezagutu zuten lagun eta kamarada batzuek ere beren testigantza eman dute. Horietako bat Joxe Mari Irazusta izan da, eta baimena eskatu diogu argitaratzeko, guri bezainbeste zuri ere gustatuko zaizuelakoan. Hemen duzue…

MANURI

Aspaldi ezagutu gintuan Manu! Euskal herritarrok Zentral Nuklearrak behar beharrezkoak genituela eta horiek gabe ezer ez ginela izango esaten ziguten aspaldiko garai haietan. Donostiatik Usurbila etorri berria hintzenean, hire herriko saltsan murgiltzera etorri hintzenean. Hirekin ikasi nian, dakidan apurra, zentral nuklear arriskutsu horietaz. Ipurterrea izaki, ez hintzen geldirik egotekoa. Nekaezina hintzen. Gogoratzen nauk, Txernobil gora eta Txernobil behera, “joan behar diat eta joan behar diat”, baita joan ere. Bururatu  orduko egin beharra izaten huen. Horrelakoak izan hituen urte haiek. Orpoz-orpo, jende asko eta anitza elkartu gintuan antinuklear mugimenduan, bereziki Lemoizko zentralaren aurkako borrokan, gure belaunaldiari aztarna utzi zion borroka hartan. Eta zorionez, zentral nuklearrik gabe, Lemoizko zentral monstruo hura gabe ere, aurrera egin dik herri honek.

Udalgintzan ere elkarrekin jardunak gaituk. Zenbat bilera luzeee… Sarritan, nahiko lan izaten genian hiri jarraitzen. Galtzapetik heldu behar izaten genian, hoa lasaiago Manu esanaz.

Oria, gure erriyua eta hire kuttuna, triste somatu diat egunotan. Babesa ematen zion lagun handi baten argia itzali zaiola zirudik. Guk baino memoria hobeagoa zeukak erriyuak. Duela urte asko, hire ekimenez, bere osasunak hobera egin zian, eta gogoratu egiten duk. Zumartegi ondoan isurtzen zituzten lohi eta hondar piloak, milaka tonak, asko kaltetzen ziaten bere bizitza, eta bazekik, batez ere hiri esker lortu zela isurketa hura etetea. Baina laster poztuko dela uste diat, bertaratzen diren arrainen artean, nonbaitetik jakingo dik, hi hor habilela jolasti, ur-zale amorratua haiz eta. Zaintzaile jarraituko duk, ibaiak dauzkan oztopoak kentzeko ahaleginean laguntzen, ziur negok.

Aurrerantzean ere saiatuko nauk hi aurkitzen, begiak erne izango dizkiat, Usurbilgo bazterrak zokomiatzen nabilenean, eta ziur, txokoren batean topo egingo diagu Manu. Jarriko dizkiagu zitak. Izango dizkiagu egonaldi gehiago oraindik. Bitartean ibili hadi igerian, pozik, eta egin hegan Manu!! Ikusi arte!!

Joxe Mari Irazusta

ManuAranbururenAgurra

La entrada Manuri aparece primero en Eguzki Talde Ekologista.

atzera
Asteroko buletina

EMAN HARTURAKO:

Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545

OlatuKoop

Ekonomia sozial eraldatzailearen sareko kide da ARGIA (Bizi Baratzea). Informazio burujabetza helburu, egunerokoan gauzak egiteko beste modu batean sinesten dugu.

BIZI BARATZEAko edukiak kopiatu, moldatu, zabaldu eta argitaratzeko libre zara, beti ere, gure egiletza direla aitortzen baduzu eta baldintza beretan egiten baduzu.

gora