Bizi-baratzea

Elikadura burujabetza

Bendeja masiboa astelehenero Getxon: "Ez gara delinkuenteak, gure barazkiekin osasuna eman eta gosea asetzen dugu"
2019-08-22  |  ARGIA

Getxoko Itzulbaltzetan abuztuaren 12an udaltzainek baserritar bati barazkiak errekisatu izana salatzeko egin dute protesta Uribeko Kostako Agroasanbladak deituta.

Astelehenean ehun lagun inguru bildu ziren Itzulbaltzetako elizpean "bendeja masiboa" irudikatzeko. Astebete lehenago udaltzainek baserritar bati barazkiak errekisatu zizkioten, hor egoteko "udalaren baimenik" ez zuelako. Baserritarrak hainbat egun zeramatzan sasoi zehatz honetako barazkiak saltzen, bendeja egiten den ohiko moduan.

Baserritarrari babesa emateaz gain, ekimenarekin Getxoko Udalaren jarrera salatu nahi izan dute, elikadura "arduratsu eta osasuntsuaren" aldeko diskurtsoa zabaltzen duen bitartean "kontsumo masiboak, elikadura gaixotuak eta gizarte eredu indibidualista garatzen dituzten merkatal zentroak" babesten dituelako, agroasanbladako kideen esanetan. Hala, autokontsumo taldeetatik haragoko beste bide batzuk jorratzen jarraituko dutela ohartarazi dute, tartean Erromo-Itzulbaltzetako "noizean noizko azokatxoa". Hurrengo astelehenetan ere bendeja masiboarekin jarraitzeko asmoa agertu dute.

Aste honetako bendejan, udaltzainek kalteturiko baserritarra ere izan da, eta Hiruka.eus-i azaldu dio denbora laburrean sasoiko barazkiak saltzen dituztenez, bera bezalako ekoizleei ez zaiela komeni erregulazio batean sartzea; horregatik eskatu die udaltzainei "bakean uzteko".


Zurea bidali