2020ko 32. Astea
Abuztuaren 3tik 9ra
Aste osoa ILGORA.
Abuztuaren 3 18:00etan ILARGI BETEA, ordura arte ILBERRI, ordutik atzera ILZAHAR.
Txertoak egiten hasteko sasoia da. Udaberrian zotzeko edo adarreko txertoa egiten den bezala uda partean begiko txertoa egiten da.
Baratzean ereiteko: tipula zuria eta gorria, Daikon arbi zuria, errukula, uraza, eskarola, txikoria, kukulua, erremolatxa, ziazerba, borraja, azenarioa, leka luzea eta kuiatxoa. Berotegiaren babesperako erein: porrua, tipulina, azalorea, brokulia, Daikon arbi zuria, uraza, eskarola, txikoria, kukulua, borraja, azenarioa, apio-arbia eta leka luzea.
Baratzean landatzeko: porrua, aza, aza gorria, brusela aza, azalorea, erromaneskua, brokulia, uraza, eskarola, txikoria, kukulua, orburua, kardua, zerba, erremolatxa, borraja, mihilua, apioa eta apio-arbia. Berotegian baita, zerba erremolatxa, borraja, mihilua eta apioa ere.
Baratzea toki lehorrean bada, taulenak jasoak baditu edo mendixka-tontorretan edo ildo-bizkarretan egina bada azpiak egin landareei, hau da, tarteko lurra estali. Azpigai ugari da: belar ondua edo berria, garoa, ezpala, txirbila, luarra, lastoa, orbela, enbor azal birrindua, papera, kartoia... Honela lurra babesten da, ureztaketa beharra murriztu eta belarrak atzeratzen dira. Toki eta sasoi hezeetan kontuz, ura gehiegi pilatu daiteke.
Arbatu edo makilak jartzea eskatzen duten landareak zaindu. Ahal den azkarren lotu gora
Luar pila toki beroan baldin badago tarteka ureztatu.
Tomateak kimatu. Hostoaren galtzerbean sortzen den kimutxoa kendu behar da. Ahalik eta txikiena denean, zauria txikia izan dadin eta guneko ordu beroenean, izerdiak zauria ahalik eta azkarren itxi dezan.
Kuiak ez usteltzeko lurra kenduko dioten zerbait jarri azpian.
Tipulak, baratxuriak eta patatak atera eta lur gainean eduki ondo lehortzen. Ondoren lur arrastoak garbitu eta toki lehor, ilun eta ondo haizeberritzen denean jarri.
Tipulak, zerbak, baratxuriak, porruak eta garatu edo tontortu diren landareen haziak jaso.
Landare usaindunak aldaxka bidez ugaltzeko sasoia da: erromeroa, ispilikua, ezkaia, salbia, azitraia..
Muintegian ditugun zuhaitz landaretxoei azpiko adartxoak kimatu.
Muintegian ur premia zaindu, landare txikiek gehiago sufritzen dute.
Fruitu arbola gazteetan txertoaren azpiko altsumak kendu
Fruitu arboletan begiko txertoa egiteko sasoia da.
Fruitu arbolen udako berdetako inausketa egiteko sasoia da.
Fruitu zuhaixkak ugaltzeko, aldaxkak landatu.
Hortentsia eta arrosa adaxka bidez ugaldu.
Hortentsia loreak lehortuta jaso nahi baditugu, orain moztu eta buruz behera, zintzilikatu, argia kentzeko paperean bilduta.
Sustrai lodiak eta errizomak dituzten landareak atera, banatu eta birlandatu: kala, irisa edo ezpata-belarra, asterra, doronicuma, zitoria...
Neguan eta udaberrian loratzeko nahi ditugun sasoiko landareak erein: bitxiloreak, bioletak, biolak, Sanjose loreak, dragoi-muturrak...
Loreontzietan ditugun landareak ureztaketarekin ongarritu.
Udaberrian loratu ziren erraboilak (lilipa edo nartzisoa, hiazintoa, idi-bihotza, azpelarra...) lurretik atera, erraboilatxo berriak sortu badira banatu eta lehortuta jaso edo zuzenean landatu.
Loraldi iraunkorra duten arrosa landareetan, petaloak galdu orduko loreak kendu. Bestela fruitu pinportak hazten hasiko dira eta lore gutxiago emango dute.
Belarrak ontzeko sasoia da. Loretzen ari denean moztutako belarra izango da aziendarentzako jaki onena..
Neguan hostajea galtzen ez duten landareekin osatutako hesiak inausteko sasoia da.
Belardi eta soropilen mozketa eta ongarriketa zaindu.
Gustuko ez ditugun landareak mozteko garai egokia: otea, menda eta batana, asuna, garoa, uztaoa edo lapaitza... Ilgoran moztea da eraginkorrena.
