Baigorrin denda irekitzeko lokal baten bila hasi ziren 2025ean, baita proiektua aurrera eramateko diru-laguntzen bila ere. "Aldi berean, laborari eta ekoizleekin harremanetan jarri ginen, baita Nafarroako zenbait kooperatibarekin eta Ekoalderekin ere", azaldu du kideak. Ekimenaren bultzatzaileek oso argi zuten ez ziotela inolako "lehiarik" egin nahi AMAPi, izan ere, laborariei segurtasuna eta diru-sarrera finkoa eskaintzen die talde horrek. "AMAP babestu nahi izan dugu, eta horregatik ez ditugu ber produktuak proposatuko dendan".

Behin lokala lortuta eta beharrezko obrak eta berrikuntzak eginda, urrian egin zuten Baigorrikoopen irekiera ekitaldia. Momentuz, laguntzaileen borondatezko lanarekin funtzionatzen du, alegia, ez dute soldatapeko langilerik dendan. "Talde ttipietan antolatzen gara: diruzaintzaz arduratzen dira batzuk, antolakuntza orokorraz besteak, komunikazioaz besteak...". Prozesu osoa parte-hartzailea izan dela gaineratu du, ideia sortzetik beretik obraraino, dena eraman baitute aurrera pertsona askoren borondatezko lanari esker. "Epizeria parte-hartzailea da Baigorrikoop, bakoitzak bere maneran egiten du ekarpena". Astean bitan irekitzen dute denda: ostegunetan 17:30etik 19:30era, eta larunbatetan 10:00etatik 12:00etara.

60 bazkidetara iristeko helburua

Produktu ekologikoak eta etxe ekoizleenak, Idoki sormarkakoak, eskaintzen dituzte dendan, baita oinarrizko jasangarritasun irizpideekin lan egiten duten etxaldeenak ere. "Etxaldeei galdetegi modukoa pasatzen diegu eta galdetzen diegu nola ekoizten duten, ze etxalde mota den, ze produktu erabiltzen dituzten... lurrarekin errespetuan ekoizten dela eta gure kalitatezko oinarriekin bat egiten dutela bermatzeko egiten dugu hori", azaldu du. Momentuz, 35 bazkide dira Baigorrikoopen, eta 25 ekoizlek hartzen dute parte. Hastapenak izanik pozik daude egitasmoak izan duen erantzunarekin, baina 60 bazkide inguru izatera iritsi nahi dutela azaldu du Sage-Segardek.

Aurrera begira, gainera, dendako eskaintzaz gain Baigorrikoopeko gunea herritarren topaleku eta jakintzak partekatzeko tokia izatea nahi dute. "Oraindik finkatu gabe dugu alderdi hori, baina proposatu nahi ditugu kozinatzeko tailerrak, kontserbak eta hartzituak egitekoak, lehengo errezetak ikastekoak... eta, horrekin batera, partekatzeko tresna eta material batzuk jartzea ere bada asmoa, eraldaketak eta horrelakoak egiteko", gaineratu du.