Urrutiak nabarmendu duenez, azken urteetan gainbehera joan den arraza da pottoka, eta egungo "abandonuari" aurre egiteko neurriak hartu ezean, galtzeko arriskua izan lezake. “Gure helburua pottokaren kontserbazioa bermatzea da, baina horretarako errentagarritasuna bilatzea ezinbestekoa da”, gaineratu du. Proiektuak hiru arlo batzen ditu: lehena ingurumena da, alegia, pottokak mendiak garbi mantentzeko egiten duen ekarpena. Bigarrena alde ekonomikoa da, lehen sektorean jardun nahi dutenentzat negozio aukera izan daitekeelako. Eta, hirugarren hanka, berriz, alde kultural edo historikoa da. “Pottoka gure lurraldeko animalia autoktonoa da, eta uste da beste zaldi arraza batzuen jatorrian dagoela”. Aranzadi elkartearekin analisi genetikoak eginen dituzte, Bizkaia inguruko zenbait aztarnategitan aurkitu ziren pottoken arrastoekin alderatzeko.

Bestetik, Pottoka Lagunen elkarteak 40 zaldi erosi dizkie bazkideei, eta proiekturako hainbat zelai eta borda bat alokatu dituzte Unanun (Nafarroa). Animaliak lau taldetan banatu dituzte: horietako bi ukuilu barruan haziko dituzte, talde bat bazka ekologikoarekin eta bestea konbentzionalarekin. Beste bi taldeak, berriz, larreetan haziko dituzte, bata borda inguruan, eta bestea Andia mendian. “Ondoren, ikerketa bat eginen dugu, testatzeko ea hazkuntza moduak nola eragiten duen pottoka haragiaren kalitatean”, dio. Nafarroako Unibertsitate Publikoarekin lankidetzan eginen dute ikerketa hori.

Haragia balorizatu eta produktu berriak probatu

Proiektuko pottokak ukuiluan eta larreetan daude dagoeneko, eta uztailean hasiko dira Sakanako Kalaska hiltegi eta zatitze gela kooperatiboan loteak egiten. “Leartikerrekin haragi produktu berriak egitea da asmoa, saltxitxak, txorixoak eta hanburgesak probatzea, adibidez”. Teknikariak nabarmendu duenez, oraindik ez dago oso zabaldua pottoka haragiaren kontsumoa, eta lanketa berezia egin beharko dute datorren urtean. “Sortzen ditugun produktuen dastaketak eta antzeko ekimenak eginen ditugu sentsibilizazioari eta kontsumoari begira”, dio.

Momentuz, Sakana mailako ekimena da Pausoka, baina teknikariak azpimarratu du han-hemen interesa piztu duela proiektuak, eta erreplikagarria izan daitekeela beste eskualde askotan ere. “Lehen jardunaldi demostratiboa eginen dugu aste honetan, eta Sakanatik kanpoko jendeak ere eman du izena, beraz, interesa egon badago”, amaitu du.