Sopelako Larrabasterra auzoan komertzio aldetik hutsune handia sumatzen zuten agroasanbladako kideek, eta horri buelta emateko asmoz bururatu zitzaien bendejaren ideia. "Ekoizpen bakoitzak berea saltzea baino, agroasanbladako kideon produktuak jartzea zen ideia, eta kolektiboki antolatzea, inor gehiegi kargatu gabe", azaldu du Garciak. Garai batean bendejak inolako baimenik gabe jartzen ziren arren, gaur egun salmenta-mahai txiki bat jartzeko ere administrazioarekin hartu-emanean egon beharra dago, eta taldean hasieratik erabaki zuten udalean behar ziren baimen guztiak eskatzea.

Baimenak lortu eta duela urtebete hasi ziren kideak Larrabasterrako plazan bendeja jartzen. "Martitzenero izaten da bendeja Urgitxieta plazan: 17:00etatik 20:00ak inguru arte egoten gara, gutxi gorabehera", dio. Sasoiaren arabera, ordutegia aldatzen dute, baina bertako jende finkoa hurbiltzen denez beti, erraza zaie mezua zabaltzea eta aldaketen berri ematea. Inguruko lau ekoizpen proiektuk hartzen dute parte agroasanbladan eta bendejan.

Herritarrekin harreman zuzena

Agroasanbladako kideak nabarmendu duenez, generoa saltzea bezain garrantzitsua da bendejaren bidez herritarrekin sortzen ari diren zuzeneko harremana. "Jendearekin hartu-eman zuzena edukitzea, haiek gugana hurbildu eta elkarrizketa hastea, lan nola egiten dugun kontatzea, edo produktu zehatz batekin egin daitezkeen errezetez hizketan aritzea... hori guztia oso garrantzitsua da, eta proiektu honek helburu bikoitza du: harremanak egitea, gure lana ikusaraztea eta herritarrekin saretuta egotea ere bada asmoa", dio. Zentzu horretan, bendeja egunetan ekimen txikiak egiteko asmoa ere badute, jendea erakartzeko.

Bendeja proiektuaz gain, bestelako egitasmo eta borrokak ere badituzte esku artean Uribe Kostako Agroasanbaldako kideek, esaterako, Getxon Gure Lurreko bi merkatu egitea eskatzen ari dira. "Eskualdeko herri nagusietakoa eta oso handia da, eta Udalari eskatzen ari gara Getxoko bi aldeetan, Algorta-Andra Marin eta Areeta-Erromon, astero jartzea merkatua", adierazi du.