Arterra Bizimoduko Baratzan Blai egitasmoarekin eskuz esku ari dira Gukalde Kontserbak proiektuko kideak, eta eraldaketetan darabiltzaten barazki asko haiei erosten dizkiete. “Hemen bertan baratzea egonda, barazkiak aprobetxatzeko kontserbena aukera ona zela ikusi genuen”, diote. Innovalocalen dirulaguntza jaso zuten proiektua abiatzeko, eta horri esker lortu zituzten eraldaketak egiteko lantegi txikirako azpiegiturak: “80 litroko autoklabea erosi genuen dirulaguntzari esker, kontserben poteak esterilizatzeko eta pasteurizatzeko erabiltzen duguna”. Eraldaketetarako gainontzeko lana eskuz eta modu artisauan egiten dute.

Txitxirioak, tomate frijitua, pistoa, kuia krema, tomate desidratatuak oliotan eta marmeladak ekoizten dituzte Gukalden. “Txitxirioak ondoko Arripodas herriko ekoizle txiki bati hartzen dizkiogu, marmeladak egiteko kiwia Baztandik dakargu eta beste fruitu asko, berriz, Aragoiko (Espainia) ekoizpenetatik”, diote. Ekoalderekin ere harremana dute, bai osagaiak erosteko, bai kontserbak saltzeko. Marmeladak azukrearekin eta azukrerik gabe, bietatik egiten dituzte: “Produktua ahalik eta bertakoena izan dadin, azukrearen ordez sagar kontzentratua erabiltzen dugu batzuetan”, gehitu dute.

Despopulatutako inguruak biziberritzeko apustua

Azoketan, kontsumo taldeetan eta inguruko herrietako eta Iruñeko hainbat dendetan saltzen dituzte kontserbak. “Jakiak Ehuntzen proiektuan ere parte hartzen dugu. Zangoza aldeko ekoizleen produktuak inguruan eta Pirinioetan banatzeko ekimena da”. Orain, Errigorarekin ere elkarlana hasiko dute. “Udazkeneko kanpainarako kuia kremak sartuko ditugu saskietan”.

EHKOlektiboko kide ere badira Artiedako bizilagunak, eta elikadura burujabetzaren eta agroekologiaren bueltako elkarte eta taldeekin saretuta egoten saiatzen dira. “Dena dela, ohartu gara errealitate oso desberdina dela gurea eta, adibidez, Gipuzkoako ekoizle batena, gu despopulazio arrisku oso handiko zonaldean baikaude, eta hemen mugimendu eta biztanle gutxi gaude. Aldi berean, uste dugu hemen ere posible direla eta behar ditugula proiektu txikiak, ekonomia sozial eta eraldatzailean kokatuak, eta jendea animatu nahi dugu. Hemen elikagaien industria da nagusi, baina ingurua ‘landatartu’ nahi dugu”, amaitu dute.