Orain arte sukalde lanak egiten aritu dira elkarteko kideak, eta kontsumitzaile nahiz baserritarrek hartu dute parte bertan. “Bost bat ekoizle eta beste hainbeste kontsumitzaile aritu gara aktiboki lanean orain arte, eskuz esku. Hori da talde motorra, baina hemendik aurrera proiektua zabaltzea da asmoa, bazkide gehiago lortzea”, adierazi du. Izan ere, azoka plazako postuaren irekierak egitasmora jende gehiago erakartzea espero dute.

“Eskualdeko ekoizleei haien produktua saltzeko erraztasunak eman nahi genizkien, eta azoka plaza berritu behar zutenez, udalarekin harremanetan jarri ginen soberan zeuden bi salmenta puntuetako baten lagapena egiteko”, azaldu du kideak. Proposamena onartu zieten, eta eskualdeko produktu ekologikoek badute postu propioa orain. “Momentuz, ostegun arratsaldetan, ostiral goiz eta arratsaldetan eta larunbat goizetan irekitzen dugu, eta txanda bidez antolatu gara ekoizleok, baina irailetik aurrera langile bat kontratatzea da asmoa”, dio. Eskualdean eta 150 kilometro baino gutxiagora ekoitzitako produktu ekologikoak dituzte eskaintzan: barazki freskoak, arroza, lekaleak, gaztak, infusioak… “Denetik dugu postuan, Arabako, Nafarroako eta Kantabriako (Espainiako Estatua) produktuak ere sartzen baitira distantzia horretan”.

Jende gehiagorengana iristea helburu

Azoka plazako postuarena ez da Ekin ta Eko elkartearen egitasmo bakarra, dena den. Elikadura burujabetzaren eta elikadura segurtasunaren inguruan kontzientziazioa eta sentsibilizazioa bultzatzea ere badute asmo, eta bide horretan sakontzeko Nina Carasso fundazioaren laguntza jaso dute, baliabide ekonomiko mugatuak dituzten pertsonek elikadura osasuntsurako duten eskubidea lantzeko, besteak beste. Gainera, bazterkeria arriskuan dauden pertsonekin lan egiten duen elkarte batekin ere elkarlanean ari dira, herrian utzita zeuden negutegi batzuetan hiru laguni lana emateko. Eta, aurrera begira, test gune bat martxan jartzeko egitasmoa dute.

“Irailetik aurrera tailerrak, formazioak, hitzaldiak eta bestelako ekimenak antolatuko ditugu”, dio. Baina, esan bezala, momentuz proiektua zabaltzea eta bazkide gehiago lortzea dute helburu nagusi, eta horretarako, herritarrei proiektuaren berri ematen eta kolaboratzaile kopurua handitzeko inurri lanean ari dira.