Iruñeko Udalak lagapenean utzitako bi hektareako lursaila lantzen dute Elkarkideko partaideek, eredu ekologikoan. “Jende asko etortzen da lanera, batzuetan 62 lagun izatera ere iristen gara”, azaldu du Candelek. Hamabi pertsonako lantaldea du Elkarkidek, erdiak nekazaritzaren alorreko profesionalak, eta beste erdiak, alor sozialekoak. “Elkarlanean aritzen gara, normalean hiru taldetan bereizten gara eta lanak denen artean banatzen ditugu”, gehitu du. Nekazaritzaren alorreko profesionalek antolatzen dituzte eguneko lanak, baina baratzezainekin adosten dute dena. “Erabakiak asanbladan hartzen dira, modu horizontalean, hona datorren jendea ez baitator baratzea egitera soilik, parte-hartze sozialerako ekimenak ere egiten ditugu”, dio.

Lursailean batik bat barazkiak ekoizten dituzte, baina landare usaintsuak eta oilotegia ere badituzte. “Kanpoko laboreak eta negutegikoak ditugu, baina neguan ia dena barruan ekoizten dugu”. Gainera, haien landareen zati bat hazietatik ekoizten dute, mintegian. “Nafarroako Hazien Sarearekin elkarlana dugu, eta Gipuzkoako Aleka proiektutik ere erosten ditugu haziak”. Ahal den neurrian, Euskal Herriko barietateak darabiltzate.

Dendatxoa Aranzadin bertan

Elkarkiden ekoizten dituzten barazki ekologikoak haien dendan saltzen dituzte, Aranzadin bertan. “Lehen Aranzadi ondoko pasealekuan genuen postutxoa, baina orain baratzeetako eraikuntza tradizional bat berreskuratu eta hor jarri dugu denda, eta gure produktuez gain, antzeko beste proiektuetakoak ere saltzen ditugu”. 450 bezerok baino gehiagok dute fundazioaren produktuak erosteko beharrezkoa den fitxa, eta hasieratik erantzun oso ona izan dute. “Astean zehar goizez dator jendea, eta erosketak egiteko baratzean sartu behar dutenez, zuzenean ikusten dute nola egiten dugun lan”.

Ekoizpenaz gain, bestelako ekimenak ere egiten dituzte parte hartzaileek: “Artea, brikolajea, xaboigintza, sukaldaritza, kirola… baratzetik haragoko ekintza asko egiten ditugu egunero”. Aurrera begira, proiektua zabaltzeko asmoa dute, esaterako, eraldaketak eginda eta ontziratutako elikagaiak salduta. Oraingoz, baimenak lortzeko prozesuan daude.