Donibane Garaziko zitadela azpian tenperatura eta hezetasun aldetik gaztak ontzeko baldintza oso onak zeudela ikusi zuten proiektuaren bultzatzaileek, harrizko murru eta tunelez osatutako gunean. “2022an egin genituen neurketak. Uda oso beroa izan zen eta ikusi genuen gehieneko tenperatura 17º-koa izan zela bertan”, azaldu du Neguelouak. Baldintza oso egokiak dira gaztak ontzeko, baina, hala ere, hozteko, airea berritzeko eta hezetasuna mantentzeko sistemak ere jarriko dituzte tunelean. “Dena dela, lekua oso aproposa da, irudi du zitadelako gunea gasnak egiteko pentsatua dagoela”, dio erdi-barrez artzainak.

Buru beltzen esnea aparte biltzea eta bereizita gasnatzea bultzatu nahi du elkarteak, baina horretarako beharrezkoa da esnea balorizatzea. Asmo horrekin, ardi buru beltzen gasna marka sortzeko elkarlanean ari dira azken urteetan hainbat gasnategirekin. “Bakoitzak bere gasna egiten du, baina gauza bateratu baten xerkan ari ginen gu, eta pentsatu genuen gasna ontzeko momentua aukera egokia izan zitekeela, horiek berdintzeko eta guziei ber itxura emateko”, dio Neguelouak. Horrela hasi ziren gasnak elkarrekin ontzeko soto baten bila, eta horrela lortu dute Donibane Garaziko Herriko Etxearekin zitadelako gunea urririk erabiltzeko hitzarmena. Hori bai, gunea babestuta dagoenez, ezingo dute egituran inolako aldaketarik egin.

2027an martxan jartzea helburu

Buru beltzen esnearekin ekoizten duten gasnategientzako proiektu bateratua da zitadelako ontze gunea, eta batik bat horiek erabiliko dute. “Gasnategientzako pentsatu genuen batez ere, produktua balorizatuz haiek esnea hobeki ordain dezaten. Hastapen batean haien gasnak sartuko dira ontzera, baina baliatu nahi duten etxe ekoizleentzat ere tokia egonen da”, gehitu du. 15-20 bat gasna tona ontzeko tokia dago, beraz, ez dira guztiak ontze prozesu osoan bertan egonen, baina denbora tarte bat behintzat han eginen dute denek. 2027an ontze-gunea martxan egotea espero dute bultzatzaileek.