Woofer gisa –mantenu truke bolada batez laborariekin bizi eta lan egiten duena–iritsi zen Arabara Ana Lafuente, elikagai ekologikoen saskiak osatzen eta banatzen dituen Urbide proiektuaren bultzatzailea. “Granadako proiektu agroekologiko batetik nentorren, nekazari izan nahi nuen, eta Arkauteko eskolan nekazaritzako erdi mailako zikloan sartu nintzen”, gogoratu du. Uda hartan Añuako baserri batean woofer gisa lanean aritu zen, eta hasiera batean tarte txiki baterako izan behar zuena luzatu eta bi urte egin zituen han. “Lurrarekin lotuta bizitzea zer den ezagutu nuen han”, dio. Momentu batean, etxaldeko nekazaritzaren eta kudeaketaren alorrak bitan banatzea eta alde bakoitza profesionalizatzea erabaki zuten, eta Lafuentek bere garaian enpresa ikasketak eginak zituenez, alor hori hartu zuen bere gain. Horrela sortu zen Urbide saskien proiektua.
2016tik ARGIAn astero esperientzia baten berri ematen du.
Urbide sortu zutenean, etxealdeko errentagarritasuna hobetzea zuten asmo nagusi. “40 produktu desberdin egin beharrean, hamar egitea zen asmoa, kantitate handiagoan, errendimendua hobetuta”. Aldi berean, inguru hurbilean ari ziren beste nekazariekin hitzarmenak egiten zituzten, haiek beste produktu batzuk ekoizteko eta saskietan sartzeko. “Etxaldean berenjena edo luzokerra ez baziren ongi ateratzen, horretarako klima egokiagoan zegoen nekazariarekin hitz egiten genuen”. Baina, egitasmoa abiatu eta urtebetera, etxaldean leherketa handi bat gertatu zen eta guztia pikutara joan zitzaien. “Ordurako hainbat hitzarmen genituen nekazariekin, eta erabaki genuen gure etxalde nagusirik gabe aurrera egitea”.
Geroztik, astero barazki saskiak eskaintzen ditu Urbidek, hurbileko produktuak eta ekologikoak eskainita, eta ekoizleekin zuzeneko harremana izanda. “Esanen nuke Urbideko saskien proiektua militantzia handiko saskien eta ohiko denda baten ereduen artean dagoela”, nabarmendu du. Eskaintza guztia ekologikoa da, eta garaiko barazkiak eta hurbilekoak izateari garrantzia handia ematen dio, baina aldi berean, ez dio uko egin katalogo zabalago bat edukitzeko beste zenbait produktu ere sartzeari. “Azkenean, bertako kuiatxoa dagoen garaian hori sartzen dut, baina urtarriletik maiatzera kuiatxoa eskaintzen ez badugu, errealitatea da jendea beste toki batera doala”, dio. Kontsumitzaileari erraz jartzearen eta bertakoa eta garaikoa lehenestearen artean oreka bilatu nahian ari dira Urbiden ere.
Bi aukera horiek dituzte Urbiden. Saski itxia dutenek astero edo bi astean behin proiektuko kideek prestatzen duten saskia jasotzen dute banaketa puntuan, momentu horretan eskaini dituzten produktuekin. Saski irekiaren kasuan, berriz, kontsumitzaileek webguneko katalogoan dauden produktuak gehitu ditzakete saski finkoan. “Gaur egun 340 familia inguruk jasotzen dute Urbideko saskia”, azaldu du Lafuentek.
Arabako hainbat tokitan banaketa puntuak dituzte zehaztuta, eta bertatik jasotzen dituzte saskiak kontsumitzaileek. “Bestalde, eskola jangeletan ere egiten dugu banaketa, hainbat ikastola hornitzen ditugu, eta esparru horretan ere esperientzia dezente dugu”, gehitu du.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
